ԿՐԹՈՒԹՅՈՒՆ       

Գործընթացի հետագա շարունակության մասին որոշումներ կկայացնեն երկու շաբաթ հետո

Ուսումնական հաստատություններում կրթական գործընթացը դադարեցնելու մասին ՀՀ առողջապահության նախարարի գրության հիմքով, հաշվի առնելով նաև կորոնավիրուսային նոր հիվանդության` հրապարակված վարակակիրների թվի ռեկորդային վտանգավոր աճը (1058 դեպք կամ 36.8%), առողջապահական համակարգը հիմնականում ռազմաճակատին ի սպաս դնելու խիստ անհրաժեշտությունը, ՀՀ ԿԳՄՍՆ որոշել է հանրակրթական ուսումնական հաստատություններում հայտարարել աշնանային երկշաբաթյա արձակուրդ` նոյեմբերի 2-ից մեկնարկելիք արձակուրդի փոխարեն` հոկտեմբերի 15-ից մինչև հոկտեմբերի 29-ը: Դասերի վերսկսման ձևի մասին որոշումն էլ, ըստ հաղորդման, կկայացվի երկու շաբաթից: Նախարարության պահանջն ու կոչն է, որ ռազմական դրության, ինչպես նաև կորոնավիրուսային հիվանդության տարածման մեծ թվերի պայմաններում խստագույնս պահպանվեն հակահամաճարակային կանոնները` դրանով հնարավոր դարձնելով դասերի վերսկսումը: ՀՀ առողջապահության նախարարի գրությամբ` երկու շաբաթով կդադարեցվի նաև մանկապարտեզների, արվեստի, գեղարվեստի, երաժշտական և մարզադպրոցների աշխատանքը, ուսումնարանները, քոլեջները և բուհերը կանցնեն ամբողջությամբ հեռավար կրթության: Սույն գործընթացի հետագա շարունակության մասին որոշումներ կկայացնեն երկու շաբաթ հետո` ելնելով ընթացիկ իրավիճակից: