ԻՐԱՎԱԿԱՆ //
Օրինագծով առաջ է մղվում արցախահայության վերադարձի իրավունքը
ՀՅԴ Հայ դատի կենտրոնական գրասենյակի տարածած հաղորդագրությամբ՝ ԱՄՆ Կոնգրեսում ներկայացվել է երկկուսակցական ,,ARMENIA Security Partnership Act,, օրինագիծը, որը նախաձեռնել են Կոնգրեսի Հայկական հարցերով խմբի համանախագահներ Գաս Բիլիրակիսը և Ֆրենկ Փալոնը: Օրինագիծն ակտիվորեն առաջ է մղվում Հայ դատի Ամերիկայի հանձնախմբի աշխատանքների արդյունքում: Ընդծվում է, որ Օրինագծի նպատակն է արգելել ԱՄՆ նախագահին շրջանցել 907-րդ բանաձևի սահմանափակումներն Ադրբեջանի նկատմամբ, քանի դեռ Ալիևի վարչակարգը չի իրականացրել հստակ և չափելի քայլեր՝ ուղղված Հայաստանի հետ կայուն խաղաղության հաստատմանը: Այդ քայլերի թվում են՝
- բոլոր հայ գերիների և պատանդների անհապաղ և անվերապահ ազատումը,
- ադրբեջանական զորքերի ամբողջական դուրսբերումը Հայաստանի ինքնիշխան տարածքից,
- Արցախահայության վերադարձի իրավունքի իրացումը,
- հայկական մշակութային և կրոնական ժառանգության պահպանության ապահովումը:
Օրինագիծը նաև նախատեսում է ԱՄՆ անվտանգության աջակցության համապարփակ վերանայում Հայաստանի համար՝ ուժեղացնելու երկրի պաշտպանունակությունն ու զսպման կարողությունները, եթե Ադրբեջանը չկատարի նշված պայմանները: ,,ARMENIA Security Partnership Act,,-ի համահեղինակների թվում են նաև կոնգրեսականներ Բրեդ Շերմանը, Դեյվիդ Վալադաոն, Քրիս Սմիթը, Գեյբ Ամոն և այլք…
Առավել մանրամասն՝ <Գործընթաց>> թերթի 23.12.2025թ. համարում