ՀԱՆՐԱՅԻՆ
ՀԱՆՐԱՅԻՆ ՀՐԱՏԱՊ ՀԱՐՑԵՐ ՀՀ ԳԼԽԱՎՈՐ ԴԱՏԱԽԱԶԻՆ ԱՆԿԱԽ ՄԱՄՈՒԼԻՑ , ՈՐՈՆՑ ՆԱ ԴԺՎԱՐԱՆՈՒՄ Է ՊԱՏԱՍԽԱՆԵԼ
Մայիսի 24-ին «Գործընթաց» անկախ թերթից պաշտոնական գրությամբ մի շարք հրատապ, հանրային հնչեղության հարցեր ենք ուղղել ՀՀ գլխավոր դատախազ Աննա Վարդապետյանին՝ նշելով. «Դուք շարունակ խուսափում եք անկախ մամուլի հարցերից Ազգային ժողովում, Կառավարությունում և այլուր: Փոխարենը ժամանակ չեք խնայում, դիցուք, ՀՀ վարչապետի քաղաքացիական կնոջ՝ Աննա Հակոբյանի մտերմիկ հավաքույթների համար, ուր դիլիջանյան Ձեր հրապարակային ելույթում երկար խոսում էիք դես ու դենից՝ ընդհուպ «հավաբուն մաքրելու» և այլ ոչ էական թեմաների շուրջ: Երկրում աճում է ատելությունն՝ ի հաշիվ տիրող անարդարության, «բեսպրեդելի», բարձրաստիճանների անպատժելիության, իսկ Դուք քաղաքական իշխանավորի կնոջ հետ մտերմությամբ առերևույթ խախտում եք քաղաքական չեզոքությունը՝ դրսևորելով կողմնակալություն՝ հօգուտ կոնկրետ քաղաքական ուժի, որը տվյալ դեպքում՝ իշխանությունն է: Պետական ու հանրային շահերը շարունակաբար վնասող պաշտոնյաները շարունակում են գործել անխոչընդոտ, նրանց առնչվող քր. գործերով չկան կալանքներ, փոխարենը վարչապետի ընտանիքին առնչվող միջադեպերով օպերատիվ, մի քանի ժամում կալանավորում է արվում: Եթե այդքան մտահոգ եք վարչապետի ընտանիքով, և կարծում եք, թե օրինապահ են, գուցե նպաստեք, որ, ի վերջո, Ձեր մտերիմ Փաշինյան ամուսինները դիմեն ամուսնության օրինականացման՝ ՔԿԱԳ միջոցով, թեպետ իրենց 4 զավակներն արդեն անդառնալիորեն զրկված են օրինական ամուսնությամբ ծնվածներին հասու իրավունքներից:
Այս ընթացքում կուտակվել են հարցեր, որոնց պատասխանները ժողովուրդն իրավունք ունի օր առաջ ստանալ, դրանք հետևյալն են.
- Քանիցս Ադրբեջանը գրոհել է ՀՀ ինքնիշխան տարածքը՝ հանգեցնելով զոհերի, տեղակայվել մի շարք կետերում, և դրա մասին առկա են Ալիևի հրապարակային խոստովանությունները: Այս ընթացքում Դուք հրատապ ԱԺ եք մտել հանրային քր. հետապնդման գործերով, փոխարենը մինչ օրս խուսափում եք միջազգային քրեական հետապնդում հարուցել նախագահ Իլհամ Ալիևի և նրա հանձնարարականները կատարած այլ անձանց դեմ, արդյո՞ք դա հրատապ չէ՝ հաշվի առնելով հետևանքները, ինչու՞ չի արվում:
- Ըստ ՀՀ մի շարք իրավական ակտերի, ՀՀ-ն Արցախի անվտանգության երաշխավորն է, այսինքն՝ ՀՀ վարչապետը լիազորված է միայն «անվտանգության երաշխավորման»…: Մինչդեռ նա ձևախեղելով 1991թ. Ալմա-Աթայի հռչակագիրը՝ Ադրբեջանին է վերագրում հռչակագրում չնշված մտացածին 86600 կմ2, նրա կազմ արհեստական խցկելով ԼՂ-ն, որն անջատվել էր խորհրդային Ադրբեջանից, ուստի այն նշյալ հռչակագրով չուներ 86600 կմ2: Ինչու՞ է ՀՀ դատախազությունը հովանի կանգնել ՀՀ վարչապետ Փաշինյանի անպատժելիության՝ թույլ տալով նրան լիազորությունների վերազանցումներ, դավաճանություն, պաշտոնեական ստեր, պետական ու ազգային շահերի դեմ շարունակվող վնասարարություն:
- Հայ ժողովուրդն իրավունք ունի ստանալ այն հարցի պատասխանը, թե ո՞ր իրավական ակտի հիմքով են հանձնվել Արցախի Հանրապետության Բերձոր քաղաքն ու շրջակա գյուղերը՝ հանգեցնելով մասսայական տնազրկումների, այլ գույքային կորուստների: Ըստ ՀՀ վարչապետի և ՊՆ նախարար Պապիկյանի՝ իրենք այդ տարածքները հանձնել են բանավոր կարգով, մինչդեռ դա կոպտագույն օրինախախտում է. ոչ ՀՀ-ում, ոչ Արցախում չկա թշնամուն հողերի հանձնման բանավոր կարգ: Ինչու՞ են նրանք ազատության մեջ, որ շարունակեն վնասե՞լ ժողովրդին: Ի՞նչ քայլեր է արել ՀՀ դատախազությունն այս հանցագործության պատժման, նրա շարունակական դրսևորումը կանխելուն ուղղված:
- Վերջերս Հայաստան ներմուծված 1 տոննա թմրանյութի և Իտալիայից Հայաստան ուղևորվելիք 2,7 տոննա կոկայինի տխրահռչակ դեպքերը հանրային մեծ վտանգավորություն են ներկայացնում, և դա չէր կարող արվել առանց ներկայիս բարձրաստիճանների հետ նախնական գործարքի: Մինչ օրս քանի՞ պաշտոնյա է կալանավորվել, որ կանխվեն հետագա նման դեպքերը:
- Այն, որ ՀՀ վարչապետը բարձրաստիճան երաշխիք ունի գործելու անպատիժ, երբ անգամ իր ավտոշարասյունը հրապարակավ հղի կնոջ է վրաերթի ենթարկում՝ պատճառ դառնալով միաժամանակ 2 մարդու սպանության, որ գուցե չլիներ, եթե ժամանակին օգնություն ցուցաբերվեր, ակնհայտ է այն փաստից, որ տևական ժամանակ է անցել, չկա որևէ կալանավորված անձ: Այդքան ցա՞ծր է հանրային վտանգավորությունն այս միջադեպի, որ այդ գործով տեղաշարժ չկա, թե՞ Ձեր մտերմությունն է խոչընդոտում էական արդյունք գրանցելուն:
- Անկախության տոնը զոհվածների ծնողների դեմ բռնի քաշքշուկի վերածած «Եռաբլուրի գործով» առերևույթ է ուժային ծառայողների հակաիրավական վարքագիծը՝ խոչընդոտելու ծնողների ազատ տեղաշարժին, խոսքի ազատությանը Եռաբլուրում: Ինչու՞ որևէ կալանավորված անձ չկա:
- ՀՀ վարչապետի քաղաքացիական կնոջ որդին՝ Աշոտ Փաշինյանը, փոխանակ իր հոր դեմ բողոքելու, որ իրեն զրկել է այն իրավունքներից, որոնք ունեն օրինական ամուսնությամբ ծնվածները, հաղորդում է տվել զոհված հերոսի մոր՝ Գայանե Հակոբյանի դեմ, որն իրեն առաջարկել էր Եռաբլուր գնալ: Աշոտն ինքնակամ նստել, ինքնակամ էլ դուրս է եկել նրա մեքենայից, և Գայանեի կողմից նրա դեմ բռնության որևէ փաստ չկա, բայց գործը որակվել է իբրև «առևանգում»: Մի՞թե անձին Եռաբլուր ուղեկցելը կալանավորման ենթակա հանցագործություն է, կամ արդյո՞ք «առևանգումն» ավելի վտանգավոր է, քան 2 անձի սպանությունը՝ հղի կնոջ վերոնշյալ դեպքով, որի համար չկա որևէ կալանավորված:
Ձեզ հայտնի է ՀՀ քրեական օրենսգրքի այն հոդվածը, որն անձի ու գույքի ծայրահեղ անհրաժեշտ պաշտպանության իրավունք է տալիս՝ արդարացնելով դրա համար ձեռնարկված միջոցները: Մեր երկրում կան բազմաթիվ քաղաքացիներ՝ մարդկային ու գույքային կորուստներ ունեցած՝ Փաշինյանի վարչախմբի ստորագիր ու բանավոր ապօրինի որոշումների հետևանքով: Նրանց ձեռքը դատախազությունը չի բռնել, և այդ իրավունքից, ակնհայտ է, որ օգտվում են ծայրահեղ պաշտպանության դիմած անձինք»: Այս հարցերին ՀՀ գլխավոր դատախազը պետք է պատասխաներ օրենքով սահմանված 5-օրյա ժամկետում, որը լրացել է մայիսի 30-ին, պատասխան դեռ չենք ստացել, գրությունն ընթացքի մեջ է:
Հրապարակվել է «Գործընթաց» թերթի մայիսի 31-ի համարում