ՔԱՂԱՔԱԿԱՆ
Փաշինյանի՝ օրեր առաջ հնչեցրած խոսքին հակադարձել է ԱՀ անվտանգության խորհրդի քարտուղարը
Նոյեմբերի 14-ին ՀՅԴ Արցախի Կենտրոնական մարմինն՝ ի դեմս պաշտոնական աղբյուրի՝ «Ապառաժ»-ի հարցում էր հղել ԱՀ անվտանգության խորհրդի քարտուղար Վիտալի Բալասանյանին՝ հիմք ընդունելով․նոյեմբերի 10-ին ՀՀ կառավարության նիստի ժամանակ Նիկոլ Փաշինյանի այն ակնարկը, թե իբր Արցախից հնչել է առաջարկ՝ ԱՀ Պաշտպանության բանակի կազմալուծման շուրջ, եթե միջազգային երաշխիքներով ստեղծվի ապառազմականացված գոտի: Նույն միտքը նա կրկնել է հաջորդ օրը հանրային կոչվող ալիքի հետ զրույցում՝ հետևյալ ելույթով. «Արցախից էլ ասում են, որ եթե շփման գծի ամբողջ երկայնքով տեղակայվեն ռուս խաղաղապահներ, Պաշտպանության բանակի փոխարեն գուցե լինեն պաշտպանական ստորաբաժանումներ»: Տեղյա՞կ է արդյոք նման առաջարկին Արցախը և ո՞ր մարմինն է հնչեցրել նման առաջարկ - «Ապառաժ»-ի այս հարցերին ի պատասխան՝ ԱՀ անվտանգության խորհրդի քարտուղարը հերքել է՝ նշելով, որ Արցախի Հանրապետության իշխանությունները ՀՀ իշխանություններին երբևէ չեն արել նման առաջարկ թե՛ գրավոր, և թե՛ բանավոր։ Անդրադառնալով գրությամբ ներկայացված կոնկրետ հարցադրումներին՝ հայտնել են հետևյալ․
- Արցախի Հանրապետության զինված ուժերը չեն կազմալուծվելու։ Հակառակն՝ իրականացվել են կառուցվածքային փոփոխություններ՝ բանակն արդի պայմաններին համապատասխանեցնելու համար։
- Արցախի Հանրապետության որևէ պետական մարմին չի հնչեցրել նման առաջարկ:
- Արցախի Հանրապետության ռազմաքաղաքական իշխանությունների միասնական տեսակետն է՝ ամեն գնով պահպանել Արցախի զինված ուժերը, դրանք համալրել թե՛ մարդկային և թե՛ տեխնիկական ժամանակակից միջոցներով և ունենալ մարտական խնդիրները կատարող զինված ուժեր»: