ՔԱՂԱՔԱԿԱՆ
ՀՀ ԱԶԳԱՅԻՆ ԺՈՂՈՎԻ ԲԱՂՐԱՄՅԱՆ ԱՆՑԱԿԵՏԸ՝ «ԹԱՏՐՈՆԻ ՏՈՄՍԱՐԿՂԻ» Է ՎԵՐԱԾՎԵԼ՝ ԱՊԱԿԵՊԱՏ «ՎԱՐԱԳՈՒՅՐՈՎ»
Ազգային Ժողովի Բաղրամյան անցակետում, որը քաղաքացիների մուտքի համար է նախատեսված, ըստ երևույթին, օգոստոսի 2-ին «Դիմադրության» շարժման նոր փուլին ընդառաջ՝ նոր ապակեպատ «վարագույր» է ավելացել, որը նաև ունի թատրոնի տոմսարկղերին համանման մի փոքր բացվածք՝ տոմսերի վաճառքի համար նախատեսված:
Եթե հաշվի առնենք, որ ԱԺ դահլիճում զարգացող սցենարները և հնչող ելույթները հաճախ թատերական ժանրի են, ԱԺ նորացված անցակետը, կարծես, հարմարեցվել է նրան, որ այցելուն թակելով ապակուն, նրա նեղլիկ «ճեղքից» պատվիրի «տոմս»: Վերջին շրջանում. սակայն, պետք է նկատի ունենալ հավանական ձանձրույթը, քանզի դահլիճում 1 կուսակցություն է՝ ՔՊ-ն, որն էլ երբեմն ծափահարում է ինքն իրեն՝ դրանով իսկ մարտահրավեր նետելով իրեն դիտող, բայց չծափահարող ժողովրդին:
Ավելին, իշխող ուժը ժողովրդական ընդվզումներին խիստ «ժողովրդավարական» ժեստով է արձագանքել՝ զոդելով դարպասները, ժամանակ առ ժամանակ էլ նռնակներ են տեղադրում հանրային կոչվող այգում, իսկ անցակետի ապակեպատումը վկայում է, որ օգոստոսի 2-ին ընդառաջ ոչ միայն ՔՊ-ն է «բարիկադավորվել», այլև ՊՊԾ-ն հոգացել է սեփական անվտանգության խնդիրն՝ իրեն առավել պաշտպանված զգալով թափանցիկ ապակու հետևից:
Նշենք, որ ԱԺ-ում ՔՊ-ն մտադիր է դիմել հակասահմանադրական քայլի՝ որպես 1 կուսակցություն զրկել մյուս քաղաքական ուժերին՝ ընդդիմադիր պատգամավորներին մանդատից, ինչը հակացուցված է ոչ միայն ժողովրդավարական, այլև բռնապետական ռեժիմների դեպքում: Ակնհայտ է, որ իշխանությունը խիստ մտահոգված է և փորձում է կանխել ընդդիմության կողմից վարչապետի իմփիչմենտը, ինչին կդիմեր ցանկացած երկրի ընդդիմություն, եթե մտադիր է երկիրը փրկել շարունակական հողհանձնումներից:
Առավել մանրամասն՝ «Գործընթաց» թերթի թիվ 320 համարում