ԲՈՂՈՔԻ ԱԿՑԻԱ
Որոշումն ընդունել է Սեպտեմբերի 21-ին գունագեղ տոնակատարություն նախաձեռնած կառավարությունը, որի դեմ բողոքի ակցիա էին անում զոհվածների մայրերը
ՀՀ Կառավարությունն այսօրվա նիստում հավանություն է տվել «ՀՀ տոների և հիշատակի օրերի մասին» օրենքում փոփոխություններ կատարելու վերաբերյալ նախագծին, ըստ որի՝ Ամանորին ոչ աշխատանքային են լինելու միայն դեկտեմբերի 31-ը, հունվարի 1-ը և հունվարի 6-ը, մյուս օրերը կլինեն աշխատանքային։ Ըստ էկոնոմիկայի նախարար Վահան Քերոբյանի, որն այս ընթացքում հասցրել է աչքի ընկնել տարատեսակ արկածներով, ազատ օրերի կրճատումն այնքան բացասական է ազդում ՀՆԱ-ի և տնտեսության հիմնական ոլորտների արտադրանքի թողարկման ծավալների վրա, որ ըստ նախարարության գաղտնի, չհրապարակվող բանաձևերի՝ Նոր տարվա տոների հաշվին 5 օր ավել աշխատելու արդյունքում, այլ կերպ ասած հոգնած աշխատողների հաշվին կարելի է ապահովել ՀՆԱ-ի ծավալի 88․6 մլրդ դրամով աճ։
Ուշագրավ է, որ տոնական օրեր է կրճատել հենց կառավարությունը, որն օրեր առաջ ցնցել էր պատերազմ ապրած և բազմաթիվ զոհեր տված հասարակությանը Սեպտեմբերի 21-ին գունագեղ տոնակատարություն նախաձեռնելու որոշմամբ, որի դեմ այսօր կայացավ բողոքի ակցիա՝ զոհված զինծառայողների մայրերի մասնակցությամբ, որոնք պահանջում էին չեղարկել այդ շոու միջոցառումը:
,,Գործընթաց,, թերթ