ԻՐԱՎԱԿԱՆ
ՆԱ ԽՈՍՏՈՎԱՆԵԼ Է ԻՐ ՀԱՆՑԱՎՈՐ ԱՐԱՐՔԸ, ՁԵՐԲԱԿԱԼՎԵԼ
Երևանի Ամիրյան փողոցում հուլիսի 18-ին տեղի ունեցած աղմկահարույց կրակոցների դեպքով ձերբակալվել է Ռոբերտ Սուքիասյանը, որը «Իմ քայլը» կուսակցության պատգամավորի թեկնածու, գործարար, հանրությանն առավելապես Գռզո մականվամբ հայտնի Խաչատուր Սուքիասյանի եղբայրն է: Նշենք, որ կրակոցները հնչել են Ամիրյան փողոցի` դեպի Սարյան հատվածում, ՀՀ ԱԱԾ Երևանի վարչության դիմաց:
Իրավապահները պարզել են, որ նույն օրը՝ ժամը 19:00-ի սահմաններում, նշված վայրում վիճաբանություն է տեղի ունեցել Երևան քաղաքի բնակիչներ, 51-ամյա Ռոբերտ Սուքիասյանի, 47-ամյա Արման Ապիյանի, 33-ամյա Վարազդատ Գասպարյանի, 29-ամյա Սարգիս Աբգարյանի և մյուս կողմի՝ Երևանի բնակիչ, 35-ամյա Նարեկ Կարապետյանի և Ամերիկայի Միացյալ Նահանգների քաղաքացի, 42-ամյա Հարութ Հաբգարյանի միջև:
Ըստ ձեռք բերված նախնական տեղեկությունների՝ Ռ. Սուքիասյանը իր մոտ եղած հրազենից կրակոցներ է արձակել, ինչի հետևանքով Հ. Հաբգարյանը ոտքի շրջանում ստացել է հրազենային վնասվածք։ Դեպքի վայր ժամանած ոստիկանները, քննիչներն ու փորձաքրեագետները հայտնաբերել են 3 հատ 9 մմ տրամաչափի կրակված պարկուճ և արնանման հետքեր:
Դեպքի առթիվ ՀՀ քննչական կոմիտեի Երևան քաղաքի քննչական վարչության Կենտրոն և Նորք-Մարաշ վարչական շրջանների քննչական 2-րդ բաժնում հարուցվել է քրեական գործ՝ ՀՀ քրեական օրենսգրքի 258-րդ հոդվածի (Խուլիգանություն) 4-րդ մասով և 235-րդ հոդվածի (Ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը) 1-ին մասով։