ՊԱՇՏՈՆԱԿԱՆ
ՀՀ ԱԳ նախարարը տեղեկացրել է ՌԴ ԱԳ նախարարին, ՊՆ-ն հայտնել, որ ընթանում են բանակցություններ
<<Մայիսի 12-ի վաղ առավոտյան ադրբեջանական զինուժը, «սահմանների ճշգրտման» հիմնավորմամբ, փորձել է որոշակի աշխատանքներ իրականացնել Սյունիքի սահմանային հատվածներից մեկում։ Հայկական ստորաբաժանումների ձեռնարկած միջոցառումներից հետո ադրբեջանական զինվորականները դադարեցրել են այդ աշխատանքները։ Այս պահին ընթանում են բանակցություններ՝ ստեղծված իրավիճակը հարթելու ուղղությամբ>>,-հայտնել է ՀՀ ՊՆ-ն՝ ի պատասխան մամուլում վաղ առավոտից տարածված լուրերի, որ թշնամին առաջացել է որոշ հատվածներում:
Նկատենք, որ այս միջադեպը հաջորդել է ՌԴ ԱԳ նախարար Ս. Լավրովի Բաքու այցին, ուստի բացահայտ անհարգանք է նրա հանդեպ: Միջադեպի շուրջ ՀՀ ԱԳ նախարարի պաշտոնակատար Արա Այվազյանը հեռախոսազրույց է ունեցել ՌԴ ԱԳ նախարար Սերգեյ Լավրովի հետ՝ ըստ ՀՀ ԱԳՆ պաշտոնական հաղորդման: Այվազյանն իր գործընկերոջը տեղեկացրել է Հայաստանի պետական սահմանին տեղի ունեցած վերջին միջադեպի մասին և նշել ադրբեջանական կողմից նման սադրանքների հրահրման անթույլատրելիությունը: Երկուստեք կարևորվել է տարածաշրջանային անվտանգության և կայունության շուրջ ձեռքբերված պայմանավորվածությունների լիարժեք կատարումը և իրադրության սրումը կանխարգելող քայլերի համադրումը: