ԻՐԱՎԱԿԱՆ
Դատական ակտն իրենց համար կանխատեսելի էր, Ծառուկյանը չներկայացավ դրա հրապարակմանն, այլ անձամբ գնաց ԱԱԾ
Երևանի ընդհանուր իրավասության դատարանը սեպտեմբերի 25-ին ժամեր տևած քննարկումից հետո բավարարեց «Բարգավաճ Հայաստան» խմբակցության ղեկավար Գագիկ Ծառուկյանին կալանավորելու վերաբերյալ ԱԱԾ-ի միջնորդությունը:Նշենք, որ նախաքննական մարմինն Ազգային անվտանգության ծառայությունն է: Ավելի վաղ, ԱԱԾ-ն տարածել էր հաղորդագրություն և տեսանյութ՝ հաղորդելով իր բացահայտման մասին, որում նշված էր, որ հայտնաբերել են <<2017 թ. ապրիլի 2-ին կայացած ՀՀ ԱԺ ընտրությունների ընթացքում ընտրողներին թեկնածուներից, ինչպես նաև «Բարգավաճ Հայաստան» կուսակցության օգտին կողմ քվեարկելու համար անձամբ կամ միջնորդի միջոցով ընտրողներին կաշառք տալու բազմաթիվ դեպքեր, որում ներգրավված են եղել ինչպես կուսակցության ղեկավար կազմը, այնպես էլ՝ կուսակցության անդամները: Պարզվել է, որ ընտրությունների նախընտրական փուլում կուսակցության ղեկավար անդամների կազմակերպմամբ, կուսակցության անդամների ակտիվ ներգրավմամբ և հստակ մշակված դերերի բաշխմամբ կուսակցության թեկնածուների, ինչպես նաև կուսակցության օգտին քվեարկելու համար ընտրողներին տրվել են հարյուրավոր միլիոն դրամների չափով ընտրակաշառք գումարներ: Ընդ որում, նախաքննության ընթացքում կատարվել են շուրջ չորս տասնյակի հասնող խուզարկություններ, որի ընթացքում առգրավվել են համակարգչի միջոցով կամ ձեռագիր եղանակով կատարված մանրակրկիտ գրառումներ պարունակող փաստաթղթեր, որոնք վերաբերում են ընտրությունների ժամանակ կատարված դրամական միջոցների շարժին՝ ընտրողին, ակտիվիստներին տված գումարի չափին, բարեգործության անվան տակ ուսանողների ուսման վարձերի փոխհատուցման, բաժանած գումարների դիմաց ստացած ձայների վերլուծության, ինչպես նաև քրեական գործի համար նշանակություն ունեցող այլ փաստական տվյալներ, ինչը հիմք է տալիս ողջամիտ պնդումներ կատարելու առ այն, որ դրանք առավելապես հետապնդել են կուսակցության ղեկավար կազմին հաշվետու լինելու նպատակ: Ուշագրավ է հատկապես այն, որ ըստ հարցաշարի, նախապես մշակվել է նույնիսկ հավաքների ժամանակ իբր պատահականության սկզբունքով օգնություն խնդրող անձանց կոնկրետ շրջանակը: Նախաքննությունը շարունակվում է, ձեռնարկվում են ակտիվ միջոցառումներ ընտրակաշառք տալու, ստանալու գործընթացին ներգրավված անձանց հստակ շրջանակը պարզելու, նրանցից յուրաքանչյուրի արարքն անհատականացնելու և արարքին համարժեք քրեաիրավական գնահատական տալու ուղղությամբ>>:
Ըստ Ծառուկյանի փաստաբանի՝ նրան կալանավորելու որոշման կայացումը իրենց համար կանխատեսելի էր, դրա համար Ծառուկյանը չներկայացավ դատական ակտի հրապարակմանը, այլ անձամբ գնաց Ազգային անվտանգության ծառայություն: Նշենք, որ Ծառուկյանը չի ընդունում իրեն առաջադրված մեղադրանքը: Նա և իր կուսակիցները տարածում են կարծիքներ, որ նրա կալանավորումը քաղաքական է: