ԳՈՐԾԱԴԻՐ Չեն կիրառվի տնտեսական գործունեության արգելման դեպքերը, վիճահարույց այլ սահմանափակումներ…
Այսօր՝ օգոստոսի 27-ին, տեղի է ունեցել ՀՀ կառավարության հերթական նիստը, որի ժամանակ հավանություն է տրվել օրենսդրական նախաձեռնությունների մի փաթեթի, որը համապատասխան ժամկետում Ազգային ժողովի կողմից ընդունվելու դեպքում Հայաստանում մինչև սույն թվականի սեպտեմբերի 11-ը երկարաձգված արտակարգ դրությունն այլևս չի երկարաձգվի, իսկ դրա ավարտից հետո կսկսեն գործել նախագծերում առաջարկվող միջոցառումները և սահմանափակումները: Ըստ այդմ, մասնավորապես, առաջարկվում է, որ արտակարգ իրավիճակ առաջանալու դեպքերում կարող է սահմանվել կարանտին: Այն հնարավոր է սահմանել առողջապահության բնագավառում պետական կառավարման լիազոր մարմնի առաջարկությամբ, մարզպետի կամ Երևանի քաղաքապետի կողմից, համապատասխան վարչատարածքային միավորում կամ դրա առանձին տարածքում, այդ թվում տվյալ տարածքում գործունեություն իրականացնող կազմակերպությունների գտնվելու վայրում և կառավարության կողմից՝ ՀՀ ամբողջ տարածքում կամ պետական սահմանի անցման կետերում կամ համաճարակի գոտին երկու կամ ավելի մարզ ներառելու դեպքում, այդ թվում՝ արտակարգ իրավիճակի հիմք հանդիսացող կարանտինի դեպքերում:
Ընդգծվել է, որ այս ռեժիմն արտակարգ դրության իրավական ռեժիմից տարբերվում է իրավունքների սահմանափակման ծավալներով, խստությամբ և կիրառվող գործիքակազմի ինտենսիվությամբ, սահմանափակման ենթակա իրավունքների պաշտպանության ավելի հստակ մեխանիզմներով: Մասնավորապես, այլևս չեն գործի էլեկտրոնային հսկողության համակարգի միջոցով մարդկանց տեղորոշման համակարգը, տնտեսական գործունեության արգելման դեպքերը, ինչպես նաև արտակարգ դրության իրավական ռեժիմի դեպքում բոլոր այն սահմանափակումները, որոնք կիրառվեցին այս ընթացքում: Վարչապետ Նիկոլ Փաշինյանը հանձնարարել է քննարկել առաջարկությունները, վերջնական տեսքի բերել նախագիծը, որից հետո նոր ներկայացնել ստորագրման, ապա ԱԺ:
Հոդվածն ամբողջությամբ՝ <<Գործընթաց>> թերթում: