ՀՀ ԱՆ ՀՎԿԱԿ-Ը՝ ՈՐՊԵՍ ՄԱՍՆԱԳԻՏԱՑՎԱԾ ՕՂԱԿ
ԿՈՐՈՆԱՎԻՐՈՒՍԸ ՉԻ ԳՆԱՀԱՏԵԼ՝ ՈՐՊԵՍ ՀԱՄԱՃԱՐԱԿ
Ինչպես տեղեկանում ենք ՀՀ առողջապահության նախարարության Հիվանդությունների վերահսկման և կանխարգելման ազգային կենտրոնի պաշտոնական կայքից, բազմաթիվ հաղորդագրություններում օգտագործվում է <<կորոնավիրուսային հիվանդության իրավիճակը մեր երկրում>> արտահայտությունը: Ներկա պահին առկա է միայն Առողջապահության համաշխարհային կազմակերպության կողմից տրված գնահատականը, կազմակերպություն, որն, ի դեպ, չունի վերադասություն ՀՀ ԱՆ իրավասու պետական գերատեսչության նկատմամբ:
Թեմայի առնչությամբ <<Գործընթաց>> թերթը մի շարք հեղինակային հարցեր է ուղղել Առողջապահության նախարար Արսեն Թորոսյանին:
Փաստացի առանց գերազանցելու նախորդ գրիպային սեզոնների միջին ցուցանիշը՝ չէր կարող իրավիճակը գնահատվել՝ որպես արտակարգ, արդյունքում ընդունել արտակարգ ռեժիմ և սահմանափակել հանրային տրանսպորտը, որի պատճառով Հայաստանում հիվանդացության ցուցանիշով առավել տարածված այլ հիվանդություններով տառապող մարդկանց հարազատները հայտնվել են տրանսպորտի գնին բազմակի գերազանցող տաքսիներից օգտվելու փակուղու առջև, սոցիալական անարդարության պայմաններում: Ի՞նչ քայլեր է ձեռնարկել ծառայողական մեքենայով շրջող առողջապահության նախարար Ա. Թորոսյանը բոլոր հիվանդներին սննդով, դեղորայքով ապահովելու ուղղությամբ, այն, ինչ անում էին նրանց հարազատները: Այս և մի շարք այլ հարցերի պատասխաններ ստանալուն պես կհրապարակենք:
Ի դեպ, ծառայողական մեքենայով շրջող վարչապետ Նիկոլ Փաշինյանը, պարետ Տիգրան Ավինյանը, պարետատան այլ անդամներ, Ազգային ժողովի նախագահ Արարատ Միրզոյանը, պատգամավորներն անտեսել են ժողովրդի կենսական անհրաժեշտության բազմաթիվ հարցեր՝ փոխկապակցված հանրային տրանսպորտի դադարեցման հետ:
Հաշվի առնելով ԱԺ-ում մեծամասնություն կազմող ուժի՝ <<Իմ քայլի>> քվեարկության՝ նախորդ իշխանությունից չտարբերվող գործելաոճը, կանխատեսելի է, որ այսօր ԱԺ-ում կոճակ սեղմողների գլխաքանակով կապահովվի արտակարգ ռեժիմը ևս 30 օրով, մինչև մայիսի 14-ը ժամը 17:00-ն երկարաձգելու մասին ՀՀ կառավարության որոշման նախագծի անցողիկությունը:
Հիշեցնենք, այս ընթացքում շարունակաբար Ոստիկանությունը հրապարակում է տվյալներ արտակարգ ռեժիմի պայմաններում, երբ մարդկանց զգալի մասն անգործ, անաշխատավարձ հազիվ է գոյատևում, կիրառված տուգանքների մասով:
Ըստ այդմ՝ ընդամենը 1 օրում ապրիլի 8-9-ին, մեկուսացման կամ ինքնամեկուսացման կանոնները կամ ազատ տեղաշարժվելու իրավունքի այլ սահմանափակումները խախտելու փաստերով 430 անձի նկատմամբ կազմվել է վարչական իրավախախտման վերաբերյալ արձանագրություն, իսկ Պարետի որոշումն ուժի մեջ մտնելուց հետո մինչև ապրիլի 9-ի ժամը 9-ը՝ 7609 անձի նկատմամբ, 2914-ը՝ մայրաքաղաքում, 4695-ը՝ մարզերում։
Բնակչությանը հորդորում են` խստագույնս սահմանափակել բնակարաններից դուրս գալը և բնակարաններից դուրս գալ բացառապես ծայրահեղ անհրաժեշտության դեպքում՝ պահպանելով Պարետի որոշմամբ սահմանված պահանջները, իսկ թե ի՞նչ նյութական միջոցներով են իրենց կենսական անհրաժեշտությունը հոգալու քաղաքացիները, քչերին է հետաքրքիր:
Հեղինակ՝ Ի. Դանիելյան