ԵՎՐԱԽՈՐՀՐԴԱՐԱՆ // ԱՐՑԱԽ
Հայտարարել է ԵԽ պատգամավորը՝ կոչ անելով ՅՈՒՆԵՍԿՕ-ին փաստահավաք առաքելություն ուղարկել Լեռնային Ղարաբաղ
Եվրախորհրդարանում Եվրոպական ժողովրդական կուսակցության անդամ, «Լեռնային Ղարաբաղի մշակութային ժառանգության ոչնչացումը» բանաձևի նախագծի համահեղինակ Պետեր վան Դալենը հայտարարել է. «Ադրբեջանն անհնարին է դարձնում Լեռնային Ղարաբաղի տեղաբնիկների կյանքը, Լեռնային Ղարաբաղի ժողովրդի կյանքը վտանգի տակ է»: Նա հավելել է, որ Ալիևները կոպտորեն ոտնահարելով մարդկանց իրավունքներն Ադրբեջանում և Լեռնային Ղարաբաղում՝ ապօրինի հարստացմամբ միլիարդներ են կուտակել: Նրա համոզմամբ՝ Ադրբեջանում տեղի է ունենում այն, ինչ սովորաբար անում են բոլոր բռնակալները՝ կոռուպցիա, քաղաքական հակառակորդների հետապնդումներ, մարդու իրավունքների խախտումներ: Բայց սա ամենը չէ, քանի որ Ադրբեջանն անհնարին է դարձնում Լեռնային Ղարաբաղի տեղաբնիկների կյանքն, անգամ այս շաբաթ հրետանային կրակոցներ են, փակվում է գազատարը: Լեռնային Ղարաբաղի ժողովրդի կյանքը վտանգի տակ է և այդ վտանգն օր օրի ավելանում է»,-ահազանգում է Եվրախորհրդարանի պատգամավորը:
«Մենք կարող ենք ասել, որ նախագահ Ալիևի օրոք Լեռնային Ղարաբաղի ժառանգությունը ոչնչացվում է, համակարգված ձևով ավերվում է. ոչնչացվում են եկեղեցիները, պատմական շինությունները, հուշարձանները, հրապարակները: Այսպիսով, Լեռնային Ղարաբաղի մշակութային ժառանգությունը ոչնչացվում է ամբողջությամբ: Եվրախորհրդարանը միաձայն է՝ ըստ էության, բոլորս էլ համաձայնել ենք և մենք հստակորեն ասում ենք, որ մենք դատապարտում ենք Ադրբեջանի բռնությունը և մենք նաև դատապարտում ենք Բաքվի կառավարության հայատյացությունը», - նշեց Պետեր վան Դալենը՝ կոչ անելով ՅՈՒՆԵՍԿՕ-ին փաստահավաք առաքելություն ուղարկել Լեռնային Ղարաբաղ՝ իրավիճակի լրջությունը ստուգելու համար: