ԿՐԹԱԿԱՆ  //  ԻՐԱԶԵԿՈՒՄ    

ՄԿՈՒ-ՆԵՐԸ, ԲՈՒՀԵՐԸ՝ ՀԵՌԱՎԱՐ ՈՒՍՈՒՑՄԱՄԲ, ԴՊՐՈՑԱԿԱՆՆԵՐԻ ԱՐՁԱԿՈՒՐԴԸ՝ 1 ՇԱԲԱԹ ԵՐԿԱՐԱՁԳՎԱԾ

ՄԿՈՒ, բարձրագույն և հետբուհական ուսումնական հաստատությունները կանցնեն հեռավար ուսուցման, իսկ դպրոցական աշնանային արձակուրդը կերկարաձգվի մեկ շաբաթով: Այս մասին ՀՀ ԿԳՄՍՆ-ը շրջաբերական գրություն է ուղարկել կրթական ծրագրեր իրականացնող կազմակերպություններին: Հիմք ընդունելով COVID-19 համավարակը՝ առաջարկվել է 2021 թ.-ի հոկտեմբերի 26-ից մինչև նոյեմբերի 15-ը բարձրագույն և հետբուհական մասնագիտական ուսհաստատություններում ուսումնական գործընթացի կազմակերպումն իրականացնել առցանց ուսուցմամբ: Ուսուցումն անհրաժեշտ է կազմակերպել տեղեկատվական և հաղորդակցման ժամանակակից տեխնոլոգիաների և գործիքակազմերի կիրառմամբ` ըստ բուհի մասնագիտական ուղղվածության և ուսուցանվող մասնագիտությունների առանձնահատկությունների:

ԿԳՄՍՆ-ը շրջաբերական գրություն է ուղարկել նաև նախնական մասնագիտական (արհեստագործական) և միջին մասնագիտական ուսումնական հաստատությունների տնօրեններին: Հիմք ընդունելով ՀՀ առողջապահության նախարարության առաջարկը` նշված հաստատություններին հանձնարարվել է ուսումնական գործընթացը 2021 թ.-ի հոկտեմբերի 26-ից երկու շաբաթով կազմակերպել հեռավար: Նախատեսվում է նաև հանրակրթական հիմնական ընդհանուր, մասնագիտացված և հատուկ պետական ծրագրեր իրականացնող ուսումնական հաստատությունների 2021-2022թթ. և 2022-2023թթ. ուստարիների օրինակելի ուսումնական պլաններով նախատեսված աշնանային արձակուրդները 1-12-րդ դասարանցիների համար երկարաձգել ևս մեկ շաբաթով՝ մինչև 2021 թվականի նոյեմբերի 7-ը ներառյալ: